الضي لسه بيتلضم جوه العيون
يمكن تشوف
يمكن تشوف لون الوجع
اللي اترسم فوق الكفون
أو حتي تلمح طرف شمس بتنتهي ساعة غروب
أو حتي تلمح باقي توبنا اللي اتحرق
و اللي اتفتق و اللي شق من الجنون
الضي لسّه
الضي لسه بيستخبي من نهاره
عايش يصلي
و هوه متمردغ في عاره
مبقتش تفرق دمعتك
عيشي حزينه
أو عيشي ملعونه بلعنتنا و تاوينا
أو ريحينا
أو موتينا
بس أوعي تكرهينا
لما فيكي نطوف نعسعس جوه ليلنا
و أما خوفنا يكون دليلنا
و أمّا نهدي قدسنا لتراب مداسهُم
و أمّا نشرب قهرنا من ماء كؤسهم
و أمّا نحني ضهرنا قدام رؤسهم
يبقي فين الضي فينا ؟
يبقي لسه مش لاقينا
أوعي مني تزعلي يا بلاد عروبتي
لسّه مش لاقي كرامتي
ضي عيني من هارب
قلتي إيه ؟؟؟
قلتي أحارب
طب بإيه ؟؟
و أنا كل شِبر في أرضي نهباه المناهب
لمّوا الشيوخ فوق المناصب
و بقيت في عزّ صباي شايب
إيدي فيها بس حجره
و الطريق مليان عجايب
اللي راكب خيله فارس
و اللي فرحان بالمجالس
و اللي مالك و اللي وارث
و اللي بايع فيكي هيبتي
و اللي منـّا و بيعادينا
بس أوعي تكرهينا
بس أوعي تكرهينا
أوعي منّي تزعلي يا بلاد عروبتي
أوعي منّي تزعلي يا بلاد عروبتي